تفتكري ايه من ذكريات شغلك في الفن ومع الفنانين زمايلك يا مدام هند ؟ ولسه على تواصل معاهم ولا لأ ؟؟
زمايل حلوين اتربيت معاهم عيلة مع بعض يعني أي حد فينا يتعب لازم تلاقيهم كلهم جنبه واللي لذيذ اوي وانسان اوي ومجامل اوي فينا هو سمير صبري مش ممكن يعني مثلا ألاقي تليفون منه يقولي زميلتنا فلانة عيانة اسألي عليها او زميلنا فلان دخل المستشفى روحي زوريه .. ده سمير صبري يا سلاااااام عليه ابن ناس فعلا
-صحيح كل الناس بتشكر في سمير صبري في الحكاية دي جدع وكريم وبيعمل مواقف جميلة جدا بدون ما حد يعرف
اه كتيييير ده انا مرة كنت عند الصايغ بتاعي وبعدين دخلت واحدة ست شيك كده من جمعية خيرية بتلم تبرعات ومعاها دفتر تبرعات فقالتلي “تاخدي كام ورقة تدفعي تمنها تبرع قلتلها “هاتي الدفتر كله” .. فقالتي فيما معناه يعني يا سلام قد كده انتو انسانيين وقالتلي ان سمير صبري عمل دور كامل في مستشفى بالسراير بكل تجهيزاته
من غير ما بيعلن عن ده ؟!
أطلاقا بقولك عرفتها بالصدفة من الست دي رغم اننا أصدقاء انا وهو وبنتكلم دايما لكن عمره ما قالهالي .. بني آدم خير وجميل حقيقي 
