في فيلم التلميذة من اخراج حسن الامام.. الفيلم فيه اغنية من احسن اغاني شادية.. الاغنية على ظرافتها بتعكس البنات في السن دا (سن المراهقة) بتفكر في ايه.. وشوف بتقول ايه
سونه يا سنسن جيتلك اهو . قبل معادنا كمان هنا هو ( طبعا واضح استعجال وتسرع وجاية قبل الميعاد)..
جيت و منايا اشوفك جيت جيت يا عنيا و استنيت (ما طبيعي تستني عشان جاية قبل الميعاد يا بنتي).
جيت يا هنايا و جيه و يايا طيفك من المدرسه للبيت (كلام لا يعتد بيه طبعا لان الاستاذ حسن يوسف مالوش طيف)
سونه يا سنسن جتلك اهو ( حاجة بتعكس ميل البنات الى تدليع وتدليل كل حاجة .. يعني هو اسمه حسن يبقى سونا وسنسن ليه .. ليه بهاء يبقى بهبوهة .. ليه عادل يبقى شكل وليه يا قلبي كل يوم بتحب واحدة).
عايزه اسلم بس عليك علشان ايدى تمس ايديك ( طموحات ضعيفة واحلام ع القد).
جيت مكسوفه لكن ملهوفه . و النبى حتى ما اتغديت ( مكسوفة وملهوفة حاجة زي سقعانة بس لابسة صيفي .. ثم هي قالت اكبر تضحية ممكن تضحيها البنت عشانك وهي انها تسيب الغدا عشانك انت يا سنسن يا خاين)
جيت مخصوص بالكعب العالى لجلى تقول صبحت ليالي ( بغض النظر ان اللي في الاغنية معاها هو الفنان حسن يوسف وهو اقصر من شادية من غير كعب فلما لبست الكعب بقت اطول منه .. بس حلم الكعب العالي هو حلم يراود الانثى حتى لو هيجيلها رباط صليبي وقطع في وتر اكيليس زي جليبرتو.. ومش عارف بتعذبوا نفسكم .. انا مرة كنت ماشي مع واحدة لابسة كعب عالي .. فقلتلها ليه لابسة كعب اطول من الفترة الانتقالية؟؟؟ قالتلي هو مرهق بس عشان ابان حلوة.. قلتلها طيب ما انتي حلوة من غيره .. راحت مشيلاني الجزمة ومشيت حافية)..
سويت شعرى و نزلت اجرى اجرى ورا الامل اللى في بالي .. جيت مكسوفه لكن ملهوفه . و اما مشفتكش اتخضيت ( يا بنتي ما هو الراجل متاخرش انتي اللي جاية بدري .. هو زمانه على وصول يعني .. والغايب حجته معاه.. ثم انتي معاكي طيفه مشي نفسك بيه).
تعرف انى كل خميس بحلم بيك يا حبيبى عريس ( طبعا تحس انها ست جميلة وبتحلم انه يتجوز .. لكن دا حلم عشانها هي .. لانها بتقوله “و احلم انى عروسه بطرحة”.. يعني تولع انت انا عايزك عريس عشان انا هبقى العروسة وبطرحة .. لكن لو مش انا العروسة .. يدوس عليك قطر يا بعيد.. واللهم ارني فيه عجائب قدرتك.
و احلم انى عروسه بطرحة.. من غير مريله ولا كراريس ( وطبعا واضح ان هدف البنات من كل دا هو التسرب من التعليم لان طبعا مشاكل التعليم عندنا من ايام الاستاذ حسن الامام ..
وطبعا بتنهى الاغنية بجملة في غاية العبقرية والحكمة لما بتقوله بصوت عالي بيوطي بيوطي لحد ما يبقى همس “اهو اهو اهو”.. ودي بتلخص كل معاني الحكمة في الدنيا.