تتعرض أي سيدة أو فتاة تقف في المطبخ لمواقف طارئة تريد فيها حلول سريعة، أو تبحث عن طرق سريعة بسبب الوقت خصوصاً إن معظم السيدات الآن تكون آتية من العمل.
وفي حكاوي مصر سنقدم لكِ نصائح مهة في المطبخ تسهل عليك..
نصائح مهمة في المطبخ
- لو الحلة سخنت على النار ما تحطيش السمنه او الزيت على طول هيتحرقوا حطى البصل اللى هتستعمليه هياخد الحرارة وبعدين حطى الماده الدهني.
- أى حاجة على النار عاوزين تزودوها مياه لازم المية تكون ساخنة جدا
- قبل ماتحطوا الكاكاو للكيك انخليه علشان مايعملش تكتلات
- لو بتعملى الكيك بالسمنة اضربى السمنة مع السكر وبعدين ضيفى بيضة بيضة
- لو بتعملى الكيك بالزيت اضربى السكر مع البيض الاول وبعدين ضيفى الزيت
- وانتِ بتطبخى أو بتعملى رز استخدمى سمنة على زيت
- الجنزبيل بيطرى أنسجة اللحوم بكل انواعها استخدميه فى التتبيلة بيسرع السوا جدا وبيساعد على امتصاص التتبيلة
- ورق الزهر من عند العطار اطحنوه واستخدموه فى التتبيلات تحفة
- كتير من المطاعم بتتبل المشويات بخليط من الجنزبيل وورق الزهر والزعتر والروز مارى
- محلول النقع بنحط لمون ماينفعش خل
- الخل بيخلى الفراخ تشد بيفرتك الفراخ لكن بتشد
- استبدلوا الخل بالليمون فى غسيل الفراخ لأن الخل بيثبت الزفاره ما بيضيعهاش وفى تنضيف الممبار كمان بلاش خل حطوا ملح وليمون وقشر الليمون
- الخل ممكن نضيفه للكبده للبطاطس معلقه منه على الكيك وفى الشاورمه
- اعملى ازازه بخاخ حطى فيها بريل على شوية خل وكملى شوية ميه هيوفر جدا فى البريل او النوع الى بتستعمليه
- قبل ماتحطى اللبن فى الحله على النار حطى معلقتين ميه لا يمكن يلزق ابدا
- اللحمه الضانى لو هتشويها التتبيل قبل الشوى على طول
- لو هتسلقيها ضيفى نص معلقة خل بتساعد على سواها بسرعه وكمان بتضيع الطعم شويه والريحه للناس الى مش بتحب ريحتها
- لو خزنتى الكرنب ورق بعد ماتحشيه اسقيه بشوربه ساقعه علشان مايجلدش
- ورق اللورا بيساعد على تفتيح لون انسجة الفراخ وانتى بتسلقيها
- لو عندك توم ناشف وفصوصه صغيره انقعيه فى شوية ميه وبعدين قشريه هيبقى سهل
- لو بتقطعى خضره او اى حاجه خضرا ورقيه حطى على لوح التقطيع رشة ملح علشان ما تتطايرش منك
- فى اكلات ماينفعش نغطى الحله واحنا بنسويها زى العدس والبصاره والويكه والرز بلبن والمهلبيه والمربات وسلق المكرونه
- فى اكلات ماينفعش نغطى الحله بعد مانسويها مش واحنا بنسويها بس زى الملوخيه والسبانخ ده وهما لسه سخنين طبعا.