علقت الفنانة نشوى مصطفى على غلاء البنزين وانقطاع الكهرباء لمدة ساعتين في اليوم.
وقالت نشوى في برنامج “بنت البلد”، المعروض على قناة “Ten”، :”أنا رزقي على الله في الجملة اللي هقولها، البنزين زاد لما العدو يمنع من عنده إنه يصدر لك طاقة علشان يذلك ويكسرك ويهينك كا مصري، وأنت تقوله مش عايز”.
وأضافت:”الكهرباء بتقطع ساعتين أو ثلاثة في اليوم، إقطعلي 12 ساعة في اليوم الكهرباء مش ساعتين أو ثلاثة بس أنا فوق العدو، العدو مش هيكسرني ولا هيذلني”.
وتابعت نشوى:”الناس اللي بتقول الكهرباء بتقطع ساعتين، إن شاء الله تقطع 24 ساعة بس تكون في بيتك متأمن، مافيش عدو يدخل بيتك يغتصب بنتك أو مراتك، ولا أمك”.
وأكملت:”الحمد لله نستحمل مع بعض، احنا صحاب البلد دي، يارب احميها واحرسها”.
رد نشوى مصطفى على الهجوم عليها بعد تصريحاتها
وكتبت نشوى مصطفى، عبر حسابها بموقع التواصل الاجتماعي “فيسبوك”: “وتاني هاقول بصوت عالي، لا بخاف ولا بتهت، هيحاولوا يسكتوا أي صوت يقول أنا هاتحمل بلدي وقت الشدة، ونعدي الوقت الصعب وبعدين نتحاسب”.
وتابعت: “هيتهموني بالجهل، وهايعايروني إني كومبارس، وهيشتموني بأحط الشتايم، ولا هاتهز، أنا مصرية مش بس كده دا أنا شبراوية، يعني متربية في حواري مصر الأصلية، وتحيا مصر غصب عنكم، وهافضل أقول: أتحمل الجوع وما اتحملش الذل”.
وقالت: “اللي مش شايف إننا بنتحارب هو حر، مكنتش فاكرة إني مأثرة ومعلمة أوي كده، تحيا مصر 3 مرات”.
يذكر أنه تصدر اسم الفنانة نشوى مصطفى تريند موقع التواصل الاجتماعي “إكس”، خلال الساعات القليلة الماضية، عقب تصريحاتها عن أسعار البنزين وقطع الكهرباء، خلال برنامجها “بنت البلد” الذي يذاع على قناة “Ten”.
وطالبت الجميع بعدم الضيق وتحمل الظروف الحالية طالما نعيش في أمان؛ مما أثار انتقاد البعض لها، وانقسمت الأراء بين مؤيد ومعارض.