اللي حضر ميمي الشربيني كمعلق هيحس بفراغ كبير بعده .. ميمي الشربيني كان بيدخل كل ماتش بكشكول .. هو مألفه .. حازم امام ليه جملة .. ابو تريكة ليه جملة .. فلان ليه جملة .. واحصاءات وأرقام لكل لاعب .. طبعا ساعتها كانت المعلومة شحيحة جدا .. فانت بتبقى متمزك من صوته اللي فيه نغمة وكلامه اللي فيه قافية ومعلوماته اللي كلها في صميم الموضوع..
يعني مثلا كنت بتفرج على ملخص للاهلي والزمالك تقريبا 2007.. لقيته بتعليق ميمي الشربيني.. خد عندك
– ابتدا الماتش وطبعا الزمالك ع شمالك والاهلي ع يمينك.. تروح لشيكابالا.. وشيكابالا باليمين.. يا سلام جون .. يُلقي بكلمة الافتتاح .. احمد جعفر.. ويضع الزي الابيض في المقدمة.
– اهو شيكابالا لاعيب ذو مهارات شاذة جدا.. قماشة تانية خالص .. لو حافظ ع نفسه يلعب في اي نادي في العالم ( يا سلام لو كان سمع النصيحة).
– المدافعين يقفون دائما اخر طوابير الاستفتاء واخر محطات الاعجاب يا سلام يا وائل يا جمعة .. 36 سنة شباب شباب الله اكبر شايف تعبير اخر طوابير الاستفتاء واخر محطات الاعجاب .. تعبير بديع لحالة الظلم اللي بيتعرضلها المدافعين لان اللي بياخد اللقطة هو المهاجم وصانع اللعب.
– شيكابالا يعطي الإذن لقدمه أن تظهر في الأضواء .. جايب 4 تجوال.. ( تجوال مش اجوال).
– ابو تريكة وجووولل جول جميل جميل جميل “اها ه هههه “.. عماد متعب.. لسة بقولكم قدم اوراقه لمملكة النجومية المبكرة.. الكرات الثابتة ليها دور كبير قوي. شوف تعبير قدم اوراقه لمملكة النجومية المبكرة..
– عماد متعب يصحح اوضاع القافلة الحمراء.. الهداف هداف يا بني.
– مش ممكن مش ممكن ايه الروعة دي .. وحسين ياسر بيحطها جون .. جميل .. جميل.. حسين ياسر المحمدي دفع 300 الف دولار من جيبه الخاص عشان يمشي في يناير.. يقفز فوق اسوار احزانه لانه كان زعلان انه ملعبش في النادي الاهلي.. لا لأ لأ .. الماتش حلو.
– يا بركااااااات جواهرجي خط الوسط .. بسميه لاعيب البلاستيشن هو كان بيحب بركات وحازم امام قوي ..
– ياه ع الماتش دا ايه يا بني العظمة دي.. لكن شوف بركات عمل ايه .. سحب البساط من الكل في اللقطة دي .. وكأنه من كوكب اخر دا انت بترقص حبات المطر يا بني.
– شوف فتح الله فين.. يا سلام يا فتح الله.. ياه جايزة الاوسكار ليك يا فتح الله.. هو فيه ميزة فتح الله .. سواء كورة حلوة او وحشة بيضحك..
– عماد متعب احد جنرالات منطقة الجزاء .. عماااااااااااد متعب متبرمج عالتهديف .. يا بني ايه يا بني دا.. جونين في ماتش اهلي وزمالك روعة روعة.
ولا تعليقه الشهير على هدف تامر عبد الحميد في نهائي دوري ابطال افريقيا اللي خده الزمالك .. وبيشوط .. وكورة حلوة .. جول جميل .. جميل جميل .. تامر تامر تامر يا سلام .. لسه بقول لحضراتكم يا تري ايه اللي بيعمله تامر عبد الحميد وحازم امام .. لكن تامر يسحب البساط من الكل وكانه من كوكب آخر تامر عبد الحميد .. ويشعل حماس الملايين من عشاق الساحرة المستديرة .. كورة خبطت وغشاشة انا قلت هتطلع برا .. يا سلام يا تامر .. اللاعيب الذي لا يراه الجمهور .. اهو الجمهور شافك كله يا تامر..
وكان بيدي لكل واحد لقب يعني
ـ صاحب الكرافتة الشيك.. دا لقب لمانويل جوزيه
ـ حسام حسن بابا نويل الكرة المصرية وكبير الهدافين المفروض استنساخ حسام حسن يا جماعة
ـ حازم إمام عنقود مهارات يا ابنى حوالين رجليك .. تسلم رجليك “التاريخ يا حازم يرفع يديه للموهوبين وينسي دون اعتذار انصاف اللاعيبين..إكسترا مهارات إكسترا حواس معجون كورة يا حازم يا إمام”
اهو ميمي الشربيني اهلاوي وواحد من أساطير النادي الأهلي كلاعب.. بس شوف تعليقه على أي ماتش للزمالك او لاي نادي تاني وشوف الحياد عامل إزاي.
المدرسة المصرية في التعليق مدرسة كبيرة وهي اللي علمت المنطقة كلها.. للاسف بنتجرف في كل حاجة وبتتسحب منك الريادة من غير ما تحس
الله يديه الصحة والعمر الطويل .. فلتة كابتن ميمي ده والله ..