ظهرت أسما شريف منير، في فيديو على السوشيال ميديا وهي تقوم بحلق شعرها كاملاً، مصرحة بأنها “شالت حمل تقيل من عليها”، فيما انتقده المتابعين ورأوا أنه مخالف للعادات والتقاليد أو أنها “بتعمل شو” لتظهر في التريندات.
وعلقت أسما على فيديو حلاقتها لشعرها الذي نشرته عبر حسابها الرسمي بموقع «إنستجرام»: «رميت ورايا حاجات كتيرة أوي بمجرد إني شلت شعري، قلبي كان بيدق جدًا وبعديها حسيت إني مليانة أدرينالين.. خطوة جريئة ومرعبة بس حاسه إني طالعة منها بدرس».
وتابعت: «عارفة إن في ناس كتير هتهاجمني، بس أنا فارق معايا إحساسي بالراحة اللي أنا حاساها دلوقتي ..عادي هيطول تاني.. بس الإحساس ده مش هحسه غير مرة.. بكره هتشوفوا النتيجة الأخيرة».
كما انتشر ببعض مواقع السوشيال ميديا أن والدها الفنان شريف منير قام بإلغاء متابعتها وهو الأمر الذى لم يحدث، خاصة بعد أن قام شريف منير بنشر فيديو عبر حسابه الشخصى بموقع تبادل الصور والفيديوهات “إنستجرام” ليرد به على هذه الانتقادات ويدافع عن ابنته ويدعم موقفها أمام هذا الهجوم.
وواجه الفنان شريف منير هجوم السوشيال ميديا على ابنته ودعم موقفها:
حيث قال: إيه الدوشة اللي إنتو عاملينها دي وإيه الضجة اللي إنتو عاملينها دي، كل ده عشان بنتي قصت شعرها قدام الكاميرا إيه الغلط اللي هي عملته، تصرف عادي جدًا مفيهوش أي حاجة، اوعوا تفتكروا إني هاجي على بنتي عشان خاطر أكسب رضاكم، دي بنتي اللي ماليش غيرها وبحبها.
و أضاف: بالمناسبة اللوك اللي عملته عاجبني وأنا مبسوط منها أوي، بنتي متربية كويس جدًا بس هي بتتصرف باللي هي حاسة بيه المهم إنها متكونش بتأذي حد.
وتابع: قبل ما تتكلموا بصوا على نفسكوا واتفرجوا على عيلتكوا وعلى الناس اللي حواليكوا قبل ما تنتقدوا وتغلطوا، اللي حصل من بنتي مش غلط ومش عيب هي مغلطتش في حد فيكو ومغلطتش في نفسها، أنا أب مسئول إني أحميها وهي حرة في تصرفاتها.
وختم: أسما أنتي شكلك زي القمر وشكلك حلو جدًا وخدتي التريند برافو عليكي، متسمعيش كلام حد ومتهتميش بكلام حد وأنا مش مهتم بالكلام اللي بيتقال عليا ولا عليها، بنتى أم ولديها بنوتة ومسئولة عن نفسها المهم إننا مش بنضر حد.
اقرأ أيضاً:-
وزير التموين يؤكد على دراسة إننشاء سوق جملة في الأقصر
بعد تواجده في نادي الزمالك.. هل يصلح حازم إمام رئيساً للنادي ؟