تبرع بمجوهرات زوجته كامله لمستشفي السرطان ودفن إلى جوارها
محمد وفيق الممثل اللى بيقدر بمشهد واحد يسرق الكاميرا من أى نجم قدامه خلينا نحكى عنه شوية حاجات كدا
أتولد محمد وفيق لأب عالم أزهرى فى الاسكندرية ودا كان سبب اساسي فى أنك اكيد عارف انه ممثل مثقف أتولد وهو صغير دخل المدرسة بيعرف يقرا ويكتب لدرجه انه كان بيقرا لوالده امهات الكتب وعاش صدمت النكبه وضياع فلسطين فى سنه المبكر دا وعاش كمان انفصال والده عن والدته عشان يبقي قادر يواجه صعاب كتير فى حياته قدام
فى الثانوية العامه جاب مجموع كليه الهندسة لكنه دخل كلية علوم بناء على رغبه والده لكنه استمر فيها سنتين وراح لوالده عشان يوافق بعد حوار كبير بينهم ان ابنه يدخل معهد فنون مسرحيه كان فى دفعته نور الشريف والحلفاوى وفنانين كتير لكنه كان شخص ملتزم معتد بنفسه كان بيحب بنت خالته الفنانه كوثر العسال ممكن متعرفهاش دى اللى طلعت مرات الوزير فى مسلسل لن اعيش فى جلباب ابى كوثر كانت اكبر منه وكانوا جيران بيقول كنا اصدقاء جدا لكنى كنت مكسوف اتكلم معاها فى حب وجواز وكدا وعشان ا كتمت حبى سنين طويلة
اول ما اتخرج اشتغل فى المسرح والاذاعه قدم بصوته ملاعيب على الزيبق وغيرها من المسلسلات الاذاعيه وكان كومبرس صامت فى مسرحيه عن فلسطين اسمها بلا حدود كان من ضمن ابطالها حسين الشربينى ومجاش فاحتاسه فراح للمخرج وقاله انا حافظ النص كله واقدر اقوم بدوره الليلادى المخرج ماصدق طبعا وطلع وفيق ع المسرح كبطل وابهر الكل بأدائه لحد ما المخرج قام وقال انه هيكمل الدور طول عرض المسرحيه وفيق وقتها قال والشربينى وقال مقدرش اخد دور زميل لحد ما تانى يوم لقا الشربينى داخل عليهم وبيقول للمخرج انه بيعتذر عن الدور عشان انضم لمسرحيه تانيه قطاع خاص وفيق فرح وبقي كل يوم يأدى العرض بشكل ممتاز زمايله كلهم بقوا يشيدوا بيه ومن هنا جه مخرجين عشان يشوفوه قدمه لهم مخرج المسرح على انه جوهرة مدفونه وكان دا حقيقي جدا اللى شاف وفيق بعد كدا فى التلفزيون وادواره المهمه فى السيرة الهلالية وقهوة المواردى وطبع دور عمره فى رافت الهجان ( عزيز الجبالى ) واللى شافه فى فيلم الهروب هيقول انه جوهرة فنيه نادرة ماخدتش فرص كفايه
فى سنه ١٩٦٧ كانت البلد كلها على موعد مع نكسه مره وكان وفيق على موعد مع نكسه شخصية وهى زواج بنت خالته وحبه الوحيد الفنانه كوثر العسال من الفنان عبدالمنعم ابراهيم وفى وقت كان كل النجوم بيروحوا لبنان وتركيا وقبرص يصوروا افلام من اياها كان وفيق مكتفي بشغله على روايات تاريخيه وصوته فى الاذاعه وبس معملش زى اى حد منهم وكمل طريقه اختاره المخرج العالمى مصطفى العقاد عشان يشارك فى فيلم الرسالة بدور عظيم هو دور عمرو بن العاص واشاد بأدائه انطونى كوين وقال العقاد مختار كست فنى كله جهابزة فى اللغه العربية بينطقوها حسب قواعدها بكل سهولة ويسر وفيق كان واحد من نجوم متأسسين صح زى عبدالله غيث وعبدالرحمن ابو زهرة ومحمود ياسين الفنان المثقف بييان على طول فى الادوار اللى زى دى
فى سنة ١٩٧٨ بيقدم فى الاذاعة كل يوم الصبح برنامج حببتى مصر مع الفنانة محسنه توفيق بيكون الكلام اللى مكتوب لهم عن اتفاقية كامب ديفيد واهميتها لمصر بيبص لمدام محسنة وهى بتبص له ويقدم البرنامج معاها وميقولش اللى مكتوب لهم يقولوه هما الاتنين وكان دا اخر يوم له ف الاذاعة هو ومحسنه توفيق عشان الخبر ينتشر بسرعه بين الاوساط الفنية والدولة تعاقبهم هم الاتنين بنشرة سرية بعدم التعامل معاهم ويبلغوهم انهم بقوا محطوطين ف القايمة السوداء لكل المنتجين مبيبقاش قدام وفيق غير انه يسافر للخليج ويشتغل هناك مع المخرج ابراهيم الصحن والكاتب محفوظ عبدالرحمن ويقدموا ثلاثية من امتع الاعمال
مسلسل احمد باشا الجزار ومسلسل الكتابة على لحم يحترق الذى ادعى انا صاحب المقال ان محدش قدم الظاهر بيبرس. بنفس براعة وفيق فى المسلسل دا واخر الاعمال كان ليلة سقوط غرناطة اعمال تاريخيه وفق منهج نشأ عليه وفيق من صغره التمثيل من اجل القضية مش من اجل اى هراء اخر
يرجع وفيق فى التمانينات عشان يكون على موعد مع مسلسل هيفضل لاجيال كتير وهو مسلسل رافت الهجان ويقوم بدور عزيز الجبالى ويتعرض المسلسل فى اوائل التسعينات عشان يرجع وفيق ينور مكانه المحفوظ فى قلوب محبيه مش بس كدا حبيبة عمره وبنت خالته كوثر العسال زوجها الفنان عبدالمنعم ابراهيم يموت ويتقدم لها وفيق اللى متجوزش نهائي طول حياته فى انتظار الاقدار تتغير وتقبل بالزواج منه وتعتزل الفن وتبقي قضيتها هذا الزوج المحب المخلص ويعيشوا مع بعض ٢٢ سنه بدون أولاد بيقول فى لقاء له
انا باخاف ازعلها جدا اصل لما ازعلها هتروح لمين انا وهى مالناش غير بعض هى مالهاش حد فى الدنيا غيرى وانا كمان ماليش حد غيرها “
بتصاب كوثر بالسرطان لسنين بيختفى فيها وفيق عشان يكون جنبها دايما لحد ما تموت وتسيبه ولما تشوف صورته يوم وفاتها هتعرف انها كانت ساكنه كل جزء فيه بيقرر وفيق التبرع بكل مجواهرتها لمستشفي ٥٧ مش بس كدا بيتبرع بشقتهم فى المهندسين لشاب كان يعرفه يتيم مقبل على الزواج بيعتزل الدنيت كلها لحد مايصاب بأزمه قلبية بعد وفاتها بسنه واحده وبيطلب يدفن الى جوارها عشان يضمهم قبر واحد
الست اللى انتظرها عشرين سنه كامله على امل تغير الاقدار ترقد الان الى جواره
ربما يكون مات لكن كفنان قدم ادوار كتير هادفه مين ينسي ادواره التاريخيه وادواره فى افلام بثقل سعد اليتيم والهروب
مين هيقدر ينسي عزيز الجبالى ظابط المخابرات فى العملية ٣١٣
الدولة للاسف نسيته ومحصلش على اى تكريم طول حياته وقال كنت اظن أنى اكيد هتكرم فى اى مهرجان للتلفزيون عن ادوارى فى السيرة الهلالية او بوابة الحلوانى لكن التكريم الوحيد اللى حصلت عليه كان من مجلة روز اليوسف عن دورى فى رافت الهجان”
