” حب ايه اللي انت جاي تقول عليه ” دي جملة قالتها سامية جمال لـ بليغ حمدي لما راح يعترف لها بحبه.
بليغ انزعج اوي وراح يفضفض مع الشاعر عبدالوهاب محمد وحكاله اللي حصل وقاله دي بتقولي حب ايه اللي انت جاي تقول عليه.
زي طبيعة أي شاعر بيركز في الجُمل والكلمات عبدالوهاب محمد الجملة عجبته ولقى انها تنفع مطلع أغنية راح قال ل بليغ “يلا معلش”و بدأ يكتب أغنية (حب إيه)وبعدها يعرض الأغنية على الست الأغنية عجبت الست و كلمت محمد فوزي يلحنها وبالفعل محمد فوزي بدأ في تلحينها وفي يوم من الايام بليغ يكون عند محمد فوزي في بيته وفوزي يسيب بليغ قاعد في الصالون ويدخل يعمل تليفون بليغ لقى ورقة ع الترابيزة مكتوب فيها أغنية ” حب ايه”.
القدر هنا بيلعب لعبته فالكلمات عجبت بليغ ومسك العود بتاعه و بدأ يلحن مع نفسه فيدخل عليه فوزي يقوله ايه ده انت لحنتها أحسن مني.
فوزي في وقتها أخد بليغ للست و قالها ده ملحن جديد بس عبقري ولحن الأغنية أحسن مني وبكل سماحه يتنازل فوزي عن حلمه ( التلحين للست ) بكل بساطة و دي تكون بداية معرفة الست ببليغ ,يلحن بليغ الاغنية اللي كان سبب فيها و الأغنية تكسر الدنيا و تبدأ رحلة طويلة من النجاحات مع الست.