تعرف ان كل النجمات دول تم ترشيحهم لدور ام كلثوم ؟
الحكاية بدأت سنة 1997 لما التلفزيون المصري قرر ينتج مسلسل عن أهم شخصية نسائية في تاريخ مصر الحديث السيدة ام كلثوم .. لكن الازمة هنا ، مين دي اللي تعمل دور ام كلثوم ؟ .. فكان الجواب من قطاع الانتاج انه لازم تبقى “نجمة كبيرة” عشان نضمن نجاح العمل .. مين المخرج طيب ؟ كانت انعام محمد علي .. المخرجة انعام ماكانتش مقتنعة بالكلام ده لكن جاريتهم ..
فاقترحوا في البداية النجمة الكبيرة “نجلاء فتحي” .. ايوا ما تستغربش ، صحيح مافييش شبه لكن هما كانوا عايزين نجمة و اسم كبير زي ما قولنا .. بعتوا الورق لـ نجلاء ، لكن نجلاء كانت ذكية جداً و رفضت الدور و قالت ان الملامح بعيدة تماماً ..
سابوا نجلاء فتحي و راحوا لـ النجمة “ميرفت امين ” .. بردو لنفس السبب ، ميرفت كانت مشغولة بفيلمين و مسلسل فاعتذرت .. راحوا لـ نجمة مصر الاولى “نبيلة عبيد” نبيلة كانت مسافرة قالتلهم ارجع من السفر بس و بعدين هقرأ الورق و ارد عليكم .. لكن هما ما صبروش و عرضوا الدور على “الهام شاهين ” .. و هنا بقا بدات المشاكل ، الهام كانت مضت عقد مسلسل “نحن لا نزرع الشوك” لكن لما جالها دور شخصية “ام كلثوم” راحت فورا فسخت العقد و اعتذرت عن المسلسل ده و قالتلهم انا جاهزة .. و كتبت الصحافة و الهام اتصورت و هي بتقرأ السيناريو و خلاص الهام هتعمل ام كلثوم ..
رجعت “نبيلة عبيد” من السفر و قالتلهم انتم بتقولوا ايه يا جماعة ده الدور ده بتاعي و الورق معايا و طلعت في الصحافة تقول ان هي اللي هتعمل الدور .. و بدات حر..ب عنيفة بين الهام و نبيلة و تصريحات في الصحافة و لقاءات و نجوم مصر كلهم اتدخلوا ما بينهم عشان يحلوا الخلاف لكن مافييش فايدة .. بعد المشا.دات و الخلافات دي اتدخل رئيس قطاع الانتاج “يحيى العلمي” و قال اللي هتعمل الدور هي “نبيلة عبيد”
طبعاً الهام كانت اعتذرت عن بطولة مسلسل عشان مسلسل ام كلثوم .. فـ الهام اتجـ ـننت و ما سكتتش و فضلت تتكلم في الصحافة ، لحد ما نبيلة عبيد ز..هقت و قالت انا كر.هت الدور قبل ما اعمله و اعتذرت هي كمان ..
بعدين قالوا ما نجيب “فردوس عبدالحميد” لانها كانت لسه عامله دور ام كلثوم في فيلم “كوكب الشرق” .. بعدين قالوا الفيلم اصلا فشل فاستبعدوها ..
بعدها اترشح اسماء كتيير زي عبلة كامل و سوسن بدر و هالة صدقي و اثار الحكيم و غيرهم .. لكن كل دول المخرجة انعام محمد علي ماكانتش مقتنعة بيهم ..
لحد ما رشحت “صابرين” .. وقتها صابرين ماكانتش نجمة زي الاسماء اللي فاتت دي خالص ، و الكل اعترض على صابرين ، لكن المخرجة أنعام اصرت على رايها و قالت ان كل النجمات اللي فاتوا دول وشهم محفوظ للجمهور و صعب انك تقنعهم ان دي ام كلثوم ، لكن صابرين وشها لسه مش مألوف اوي للناس زي الباقي .. و اتحدت المخرجة الكل بـ “صابرين” .. و في النهاية طلع المسلسل زي ما شوفتوا