طبعا مفيش حد في بر مصر كله ميعرفش فيلم أفواه وأرانب .. محمود ياسين وفاتن حمامة والنهاية السعيدة بانتصار الطبقة الكادحة على الطبقة الرأسمالية.. لكن مفيش حد في بر مصر كله يعرف أصلا إن فيه جزء تاني من الفيلم إسمه “كفر نعمت ”
الجزء الثاني إتسجل واتعرض إذاعي ولظروف ما متصورش سينمائيا ..وخليني أصدمكوا بإن الجزء الثاني ظهر فيه الفجوة الكبيرة في الطبقات بين محمود ياسين وفاتن حمامة ..مقدرش يستحمل الفارق الكبير منهم من حيث التعليم والأصل والفقر وهي مقدرتش تتأقلم مع حياته وسهراته وانشغلت عنه بالأرض والمشاريع اللي عملوها فطلقها وبعتلها ورقتها ..وعرف عليها واحدة تانية ومشي معاها ..حياتهم كانت مليانة مطبات وعدم استقرار ..فجوة بتزيد وكلام معايرة بيتقال في كل موقف اللي هو شوفي انتي فين وانا فين
بيحكيلنا الجزء ده عن باقي الحدوتة.. نعمت (ااسيدة فاتن حمامة) اخدت اختها باولادها مزرعة محمود بيه (محمود ياسين) وبتقابل مشاكل كتير سببها راجية هانم (ماجدة الخطيب) اخت البيه الي ماتقبلتش فكرة ان اخوها اتجوز واحدة دون المستوى فابتدت بمعاونة سكرتير اخوها (كريم) بافساد حياتهم بتصرفات غير قانونية (تبوير ارض نعمت – قتل عنبر الفراخ كله-سرقة ماكينات المزرعة…..) وابتدت تعرف اخوها على سيدات مجتمع راقيات من وجهة نظرها زي نجوان هانم (نبيلة عبيد) والمهندسة كاميليا (هدى رمزي) الامر الي بينتهي بطلاق محمود لنعمت غيابي.
في نفس الوقت بتكمل نعمت مساندة اهلها فبتشغل عبد المجيد (فريد شوقي) على عربية نقل بتشتريهاله ويكمل اقساطها وبتشغل كل ولاد اختها في المزرعة وبيكملوا تعليمهم لحد ما رفاعي مثلا (محسن محي الدين) بيدخل كلية زراعة وخليل بعد عدة محاولات بيفتح ورشة.
وبينتهي المسلسل الأذاعي برجوع نعمت لمحمود بيه بعد محاولة قتله على يد النشرتي (جميل راتب) ومعاونه (حسن حسني) الي كانوا عايزين يستولوا على ارض جديدة اشترتها نعمت لاستصلاحها”.