من الفنانين اللي الناس بتنسى تتكلم عليهم هو الفنان القدير أبو بكر عزت.. مع انه من الفنانين التقال جدآ في التمثيل تحس كدا انه فنان له هيبة لما كان بيظهر في أي عمل.. مع إن بدايته كانت في الكوميديا الخفيفة إلا إنه كان عنده حضور طاغي وانا واحدة من الناس اللي من زمان معجبة بتمثيله جدآ لانه كان فنان متنوع لاقصي درجة ده غير انه عمل أدوار مهمة ومميزة كتير وصاحب تنوع كبير في مسيرته الفنية
كوميدي شغال، ڤيلين تمام، طيب وصاحب قيم هايل، نصاب تلاقي.. نوع نادر من الممثلين اللي بيمحوا حضور اي حد معاه في المشهد مهما كان مين
لا يمكن تتخيل اللي قايم بدور الشاب المستغل أو المستهتر في فيلم تلاتين يوم في السجن وهارب من الزواج وميرامار و سنقر الكلبي في مسلسل الزيبق ودوره المهم في فيلم المرأة والساطور مع نبيلة عبيد و فيلم اصدقاء الشيطان مع نور الشريف و فيلم ضد الحكومة والهروب مع احمد زكي و دوره في مسلسل زيزينيا مع يحيي الفخراني و دور اليهودي واللي كان مميز جدا في مسلسل السقوط في بئر سبع هوا هوا نفس الممثل اللي عامل دور الاسطي عمارة في مسلسل أرابيسك و دور الدكتور في فيلم استقالة عالمة ذرة و دوره الجميل في مسرحية الدخول بالملابس الرسمية و دوره الكوميدي الشهير في مسلسل الزوجة اول من تعلم… تحول كبير في اختيار الأدوار المهمة.
الجانب بقا اللي محدش يعرفه فعلا عن أبو بكر إنه كان رومانسي وحنين لأبعد حد.. الكلام دا بيأكده قصة حبه وجوازه من زوجته الوحيدة الكاتبة الكبيرة كوثر هيكل واللي فضلت على ذمته واحد و اربعين سنة لغاية ما رحل عن دنيتنا..
رحم الله الفنان الكبير أبو بكر عزت ❤️