شايفين الست الحلوة إللي في الصور دي؟
دي بقى الست عصمت عبد العليم، واحدة من أصوات مصر الجميلة، بنت قرية الحواوشة المنصورة مواليد ١٩٢٣، فاكرين الصوت إللي غنى في الليلة الكبيرة طار في الهوا شاشي؟ أهي دي الست عصمت😊، وهي إللي غنت يا ورد على فل وياسمين وشاركت فريد الأطرش في أوبريت بساط الريح، وعشرات أغاني سمعتوها ومش عارفين مين الصوت القمر إللي بيقولها
الست عصمت فتنها وهي طفلةصوت أم كلثوم، وابتدت تغني وتحفظ أغانيها لحد ما سمعها الشيخ محمد السنباطي والد العظيم رياض السنباطي واقنع والدها انها لازم تنتقل للقاهرة، وفي الوقت ده كان رياض السنباطي بيعلمها عود ومقامات، وبالفعل جت الست عصمت للقاهرة مع اختها وابتدت مشوارها إللي فيه أكتر من ٥٠٠ أغنية واوبريت اذاعي وصوتها هتلاقوه في أفلام زي عبيد المال والصقر وظلموني الناس.
صوتها ممكن تحبه أو لأ مش ضروري، بس لازم تعرف على الأقل بوجودها، دي واحدة من الأغاني إللي أنا شخصيًا بحبها، اسمعوها واعرفوا بلدنا كان فيها مين لأنه تاريخنا، وأصواتنا وقوتنا إللي عمرها ما هتغيب 💚