بدل ما تروحي تخدمي فى الافلام اخدمى نفسك احسن.

وقالت انه فى مرة منتج بعت لها علشان تعمل دور خدامة ولما عرف المبلغ اللى بتاخده قالها “ياه.. ده الخدامة بتاعتى بتكنس وتمسح وتطبخ بحق وحقيقى وبتاخد 3 جنيه فى الشهر.. وانتى بتمثلي دورها وعايزة 300 جنيه؟”

وبعدها التفت لمخرج الفيلم وقاله “انا راح ابعت لك خدامتي تمثل الدور ببلاش” وطبعا الست زينات اتضايقت من تصرفه وسابت له المكتب ومشيت..

مرة تانية كانت بتتفاوض على شرا عربية جديدة واتفقت مع صاحب العربية انه يسيبها لها كام يوم علشان تجربها .. وفى يوم وهى بتجربها جات تنزل منها فلقت كام واحد ملوم حواليها ومنهم واحد بيقول “يا سلام على الخدامين بتوع الايام دى.. يركبوا عربيات كمان”.. ولما لقى زينات مش بترد قالها “ادعى لاسيادك اللى ركبوكي عربية” ..

مرة تالتة استعانت بخادم نوبي وكانت كل وظيفته انه ينضف البيت الصبح ويمشى .. ورغم انها كانت بتدفع له مبلغ محترم الا انه جه فى يوم وقالها انا عايز امشى فسألته ليه.. فقالها بصراحة زمايلى بتيريقوا عليا وبيقولوا لى ازاى تشتغل خدام عند خدامه..

وفى مرة رابعة اشتغلت عندها خدامة.. وفى يوم قالت لها خدينى اتفرج معاكى على فيلمك الجديد.. ولما رجعوا من السينما لمت هدومها وقالت لها انا همشى.. فزينات قالت لها : ليه؟.. فالخدامة قالت : انا بس بقول بدل ما تروحي تخدمي فى الافلام اخدمى نفسك احسن.

ومرة خامسة راحت تأجر شقة ولقت ايجارها 35 جنيه فقالت لوكيل العمارة :ليه .. بنسرق؟ فرد وقالها وانتى مالك هو انتى اللى هتدفعي ولا ستك.. وقالت زينات :” لم احتمل هذا الكلام من افندي المفروض انه يفهم ان التمثيل شيء والشخصية الحقيقية شيء اخر.. فقلت له ما قاله مالك فى الخمر”..

مرة سادسة.. كانت راكبة تروماي.. ولقت جنبها ولد صغير بيقول لأمه :ماما مش انتى عايزة شغالة بدل نبوية” فقالت “اه .. ليه؟ فقالها الشغالة اللى شفناها امبارح فى الفيلم اهه.. واضطرت الست أنها تعتذر للست زينات .. اللى قالت “كثيرا ما ألبي الدعوة الى حفلات بعض الزملاء .. ثم أفاجأ أثناء الحفلة.. بأحد المدعوين يصيح مشيرا نحوي قائلا هاتى كوباية مية يا شاطرة.. وتضطر الشاطرة التى هى أنا إلى اعطاء درس لحضرة المدعو.. درس لا ينساه ابدا..