الرئيسيةحوادث

الكفن الذي أنهى 25 سنة من الثأر.. حكاية صلح النخيلة

تخيل إنك تعيش في قرية، تصحى كل يوم على نفس البيوت، وتمشي في نفس الشوارع، لكن فيه بيوت ما ينفعش تخبط على أبوابها.. وفيه أسماء بمجرد ما تتقال، ترجع معاها ذكريات الدم والخوف. دي مش حكاية من فيلم.. دي حكاية قرية النخيلة، التابعة لمركز أبوتيج بمحافظة أسيوط.

هنا، ومن 25 سنة، بدأت خصومة ثأرية بين عائلتي سباق وزوكي.. خصومة ما كانتش مجرد خلاف بين عيلتين، لكنها كانت بداية لسنين طويلة من الوجع.سنة ورا سنة.. والثأر بيولد ثأر.. والدم بيجيب دم.. لحد ما وصل عدد الضحايا إلى 8 أشخاص.

خمسة من عائلة زوكي، من بينهم شخص من خارج العائلة، لم يكن طرفا في الخصومة، لكنه دفع حياته ثمنا لها.. وثلاثة من عائلة سباق.

ورا كل روح أم فقدت ابنها، وأب انكسر ظهره، وبيت فضل مستني حد مش هيرجع.

ومع مرور السنين، كبرت الخصومة.. وكبر معاها الخوف. بقت المصافحة صعبة، واللقاء مستحيل، وكل طرف شايل في قلبه حكاية وجع عمرها ربع قرن.

لكن السؤال اللي فضل مطروح: إلى متى يستمر الدم؟ وكم ضحية أخرى لازم تدفع حياتها قبل ما حد يقول كفاية؟

إلى أن جاء اليوم اللي انتظرته القرية طويلا…

يوم مختلف عن كل الأيام.. سرادق كبير اتنصب في النخيلة، وآلاف الأهالي توافدوا من القرية والقرى المجاورة ومختلف مراكز أسيوط.

رجال أمن، ومشايخ، وقساوسة، ونواب، وعمد، وحكماء.. الكل حضر، مش علشان يشهد خصومة جديدة، لكن علشان يشهد نهايتها.

وبحضور مساعد وزير الداخلية وقيادات الأزهر والكنيسة، جاءت لحظة الصلح.. لحظة تقديم الكفن، اللحظة اللي اختصرت 25 سنة من الألم في مشهد واحد.

يمكن الكفن كان أبيض.. لكن الحكاية اللي وراه كانت مليانة دموع وذكريات ووجع. وفي اللحظة دي، ما كانش المهم مين كسب ومين خسر.. لأن الحقيقة إن العائلتين خسروا كتير، والقرية كلها دفعت الثمن. 25 سنة من الثأر انتهت بالصلح.. لكن 8 ضحايا هيفضلوا شاهدين على إن الدم عمره ما بيجيب غير الدم. وفي النخيلة، كان الدرس واضحا..مش كل بطولة إنك تاخد بتارك.. أحيانا البطولة الحقيقية إنك تقدر تسامح، وتمنع دم جديد من إنه يسيل. النخيلة.. حكاية قرية اختارت الحياة، بعد ربع قرن من الخوف والدم.

مقالات ذات صلة

زر الذهاب إلى الأعلى