سؤال خارج الإعداد بقلم الكاتب :سعدغنيم
قبل الحلقة بيومين، ناداه رئيس التحرير وقال له:
— الجمعة دي عاوزين حلقة الناس تفضل فاكراها. موضوعنا عن الفرصة التانية… هل الإنسان يقدر يرجع لحاجة خسرها، ولا في أبواب لما بتتقفل خلاص؟
ابتسم وقال:
— موضوع حلو. والضيف مين؟
— ضيفة مهمة جدًا، وحكايتها تستاهل. بس اسمها مفاجأة ليك وللجمهور. إنت جهز أسئلتك، وسيب الباقي علينا.
رجع بيته، وفتح الكمبيوتر، وبدأ يقرأ ويكتب. طول عمره بيحب التحضير، لكن المرة دي كان حاسس إن الموضوع يخصه بطريقة مش فاهمها.
كتب سؤالًا:
«هل كل الناس تستحق فرصة تانية؟»
شال كلمة «كل»، وبص للسطر شوية، وبعدين كتب تحته:
«وإزاي نعرف إننا اتغيرنا فعلًا؟»
على مدار يومين، جهز أوراق أكتر من اللي محتاجها. قرأ حكايات عن ناس رجعت لحلم قديم، وناس بدأت حياتها من جديد، وناس قابلت أحبابها بعد سنين.
أما السؤال اللي فضل يكتبه ويمسحه، فكان:
«ولو رجع الشخص… يرجع معاه الإحساس؟»
ليلة الحلقة، وصل الاستوديو بدري. راجع المقدمة، وظبط الميكروفون، وسأل للمرة الخامسة عن اسم الضيفة.
ضحكت المعدة وهي بتسحب منه ورقة الأسئلة:
— اصبر بقى، المفاجأة قربت.
قبل الهوا بثواني، قعد في مكانه. سمع المخرج في السماعة:
— هنبدأ بمقدمتك، وبعدها تدخل الضيفة. جاهز؟
أشار بإيده.
نورت اللمبة الحمرا فوق الكاميرا، فابتسم ابتسامته المعتادة، وقال:
— مساء الخير… ساعات بنفتكر إن أصعب حاجة في الحياة إننا نخسر شخص بنحبه، لكن يمكن الأصعب إننا نفضل سنين مش عارفين: إحنا خسرناه عشان الظروف كانت أقوى، ولا عشان إحنا ما حاولناش كفاية؟
سكت لحظة، وبص للأوراق.
— النهارده بنتكلم عن الفرصة التانية…
فتح باب الاستوديو.
دخلت هي.
عرفها من أول خطوة، قبل ما يشوف وشها كاملًا. نفس المشية الهادية، ونفس الحركة الصغيرة وهي بترجع خصلة شعر ورا ودنها.
كانت صاحبته قبل ما تكون حبيبته.
أول واحدة سمعته وهو بيتدرب على مقدمة برنامج قدام مراية،
وأول واحدة قالت له: «إنت هتبقى مذيع شاطر، بس بطل تبص للورق كل كلمتين».
وقفت قدامه ومدت إيدها:
— مساء الخير.
قام متأخرًا، كأنه افتكر فجأة إن المفروض يقوم.
— مساء النور… أهلًا بيكي.
قعدت، وهو فضل واقف ثانية زيادة، لحد ما سمع المخرج:
— اقعد يا أستاذ… إحنا على الهوا.
بص لأول سؤال. الكلمات قدامه واضحة، لكنه قرأها مرتين من غير ما يفهمها.
رفع عينه ليها وقال:
— إنتِ عاملة إيه؟
ابتسمت:
— الحمد لله.
هز راسه، وبعدين سأل بهدوء:
— بجد؟
وصل له صوت المخرج:
— ادخل في الموضوع.
اعتدل في قعدته، وحاول يرجع لصوته المعتاد:
— موضوعنا النهارده عن الفرصة التانية… تفتكري الإنسان ممكن يسامح حد اتأخر عليه؟
قالت:
— على حسب. اتأخر عشان ما كانش قادر، ولا عشان كان ضامن إنه هيفضل مستنيه؟
نزل بعينه للأوراق. السؤال اللي بعده كان عن استعادة الثقة، لكنه سمع نفسه بيقول:
— ولو كان فاكر إنه بيعمل كل ده عشانها؟
بصت له قليلًا قبل ما ترد:
— كان لازم يقول لها. الناس ما تعرفش تعيش على التخمين.
في السماعة، المخرج ناداه باسمه. ما ردش.
كل الأسئلة اللي تعب فيها اختفت، وحل محلها كلام قديم، كان دايمًا بيلاقي سبب يأجله.
قال:
— أنا كنت فاكر إن لما أنجح، كل حاجة هتتصلح.
— وأنا كنت مستنية تكلمني، مش مستنية أشوفك في التلفزيون.
بص لها. لأول مرة من أول الحلقة، نسي الكاميرا تمامًا.
— كنتِ بتتفرجي عليا؟
ابتسمت ابتسامة صغيرة:
— كنت لسه بقلق عليك لما تبص للورق كتير.
ضحك، لكن عينه لمعت. قلب الورقة اللي قدامه، مع إنه ما كانش بيدور على حاجة.
— طب ليه ما اتصلتيش؟
— وإنت ليه ما اتصلتش؟
فضل ساكتًا.
قدامه كانت الست اللي حضر لها يومين من غير ما يعرف اسمها، ووراها سنين ما حضرش فيها جملة واحدة يقدر يقولها لما يقابلها.
سمع المخرج يقول بحدة:
— فاصل. قول فاصل!
لكنه مال لقدام وسألها:
— ينفع نبدأ تاني؟
بصت ناحية الكاميرا، وبعدين رجعت له:
— إنت فاكر إننا لوحدنا؟
التفت حواليه، كأنه شاف الاستوديو لأول مرة. المصور واقف مكانه، والمعدة حاطة إيدها على بقها، واللمبة الحمرا لسه منورة.
حاول يتكلم، لكن صوته ما طلعش.
وفجأة، سمع رنينًا عاليًا.
فتح عينه.
كان نايم على الكنبة، والكمبيوتر مفتوح قدامه، وأوراق الحلقة واقعة على الأرض.
الموبايل بيرن. رئيس التحرير.
رد بصوت مخنوق:
— أيوه…
— إنت لسه نايم؟ اصحى يا نجم، الحلقة بالليل. وبعتنا لك بيانات الضيفة، شوفها وجهز المقدمة.
اعتدل بسرعة:
— الضيفة مين؟
قال له اسمًا لا يعرفه.
سكت لحظة، ثم قال:
— تمام… هراجعها وأكلمك.
قفل، وفضل يبص للموبايل. فتح الرسائل القديمة، ووصل لاسمها.
آخر رسالة منها كانت من سنين:
«لما تفضى، محتاجة أتكلم معاك».
قرأها، وحط الموبايل جنبه.
مد إيده للأوراق، ثم توقف.
رجع مسكه، وكتب:
«أنا عارف إني اتأخرت قوي،
ومش عارف إذا كان ينفع أبعت لك دلوقتي… بس نفسي أطمن عليكي،
ولو يناسبك، نتكلم».
قرأ الرسالة مرة واحدة، وضغط إرسال قبل ما يلاقي سببًا جديدًا للتأجيل.
وبالليل، دخل الاستوديو، ورتب أوراقه، واستنى إشارة المخرج.
وقبل ما تنور اللمبة الحمرا، بص للموبايل للمرة الأخيرة.
كانت ردت:
«أنا كويسة… نتكلم بعد حلقتك. وبطل تبص للورق كتير».
ابتسم.
المرة دي، كان صاحي.
